美好年代

今日熱到冇晒意見，絕對要投靠透心涼嘅雪花冰去呵護身心，即刻自動自覺去美好年代嘅氹仔分店報到！呢度唔止係個稱職嘅梳乎厘班戟供應商，最近就有對抗嚴夏嘅消暑聖物- 雪花冰嘅冰爽上架！一次過推出四款口味嘅雪花冰；冰雪佳麗分別係草莓牛乳、巧克力脆脆、提拉米蘇同泰式奶茶，唔止細路仔，做咗大人都可以暫時忘卻煩惱咁親親雪花冰，同ELSA公主打成一片！
提拉米蘇雪花冰
邊個話上咗年紀唔可以好趣致咁食雪花冰㗎？呢個更大人嘅專屬口味添！話時話，平時唔係話唔鍾意食TIRAMISU，只係怕膩所以會自覺地控制個攝取量，難得美好年代將其化成輕盈嘅雪花冰，啪晒成個絕對easy，基底係馥郁嘅咖啡同香甜嘅牛奶，配上濃郁嘅自家製TIRAMISU醬同高純度可可粉，濃郁感由頭帶到落尾！
泰式奶茶
以香濃嘅泰式奶茶作冰底，茶味有點到即止嘅回甘，食到核心會發現到奶茶卡士達嘅秘密隱居，將茶味更立體咁勾勒出嚟，食之前先將黑糖珍珠傾倒於雪花冰中，將泰式奶茶呢杯泰國國民飲品完美演活，仲加埋珍珠添！
巧克力脆脆
由意大利走到泰國，今次嚟個鄰埠嘅港風風情，以阿華田作為冰底，中間潛藏咗香醇嘅朱古力醬同充滿口感嘅阿華田脆脆，啱晒朱古力狂迷！
草莓牛乳
冰底係純情嘅草莓牛奶，中間竟深藏不露地加插咗招牌鬆餅嘅戲碼，以酸甜解膩嘅自家製草莓醬打圓場，頂層有芝士奶蓋同草莓乾做作呼應，呢款老少咸宜！